اهلا بكم في مدونه Esam Tech نتمني ان تكونوا في افضل حال دائما يارب
اول هاتف قابل للطي من سامسونج Galaxy fold
رسميا خلاص سامسونج أعلنت عن ال Folding phone او التليفون اللى بيطوى :D
واللى اسمه Galaxy Fold والموضوع دا هتلاقي فيه كل المعلومات اللى عاوز تعرفها عن الموبايل .. شوف الصور ومتع نظرك قبل ما تعرف السعر ويجيلك صدمه :"D
الموبايل او يعنى ممكن نقول التابلت Galaxy Fold دا هتلاقي فيه شاشتين .. الشاشه الصغيره وهى اللى بتكون ظاهره و انت قافل الموبايل و دى حجمها بيكون 4.7 بوصه بدقة HD+ و طبعا SuperAMOLED .. لكن مش دا المهم لان المهم بجد الشاشه الضخمة اللى هتلاقيها لما تفتح الموبايل :D
الشاشه التانيه دى حجمها 7.3 بوصه بدقة 2K تقريبا و تحديدا 2152*1536 و طبعا AMOLED وقابله للطى
الشاشه زى ما هتلاحظ فى الصور فيها نوتش فوق على اليمين و دى فيها الكاميرتين الأماميتين
الكاميرا الأولى 10 ميجابيكسل وبفتحة عدسة 2.2
والتانيه 8 ميجابيكسل مستشعر العمق او ال Depth sensor ..
وخلى بالك الكاميرتين دول موجودين فى النوتش اللى موجوده فى الشاشه الكبيره و انت فاتح الموبايل
اما الكاميرا الأساسيه فى الموبايل فهى فى الحقيقه 3 كاميرات ..
"ودول موجودين فى ظهر الموبايل و انت قافله"
- الكاميرا الأساسية 12 ميجابيكسل وطبعا Dual Aperture وهما F1.5 و F2.4 و بتدعم ال OIS و ال DualPixel
- الكاميرا التانيه تيليفوتو و بنفس الدقة 12 ميجابيكسل وبفتحة عدسة F2.4 وفيها كمان OIS
- الكاميرا التالته بقى هى كاميرا Ultrawide بفتحة عدسة F2.2
وخلينى اقولك ان فيه كمان كاميرا ساته فوق الشاشه الصغيره اللى قدام عشان مكالمات الفيديو و كدا .. يعنى الجهاز فيه 6 كاميرات فى 3 اماكن مختلفه
جهاز زى دا طبعا مش هينزل بمعالج ميدياتك نواه وربع :"D لان الجهاز جاى بسنابدراجون 855 الجديد مع 12 جيجا رام و 512 جيجابايت ذاكرة داخليه
و أخيرا بطارية الموبايل 4380 ميللى أمبير
والجهاز هيكون متوفر بداية من 26 ابريل اللى جاى
عشان الجهاز هيكون فى حدود 1980 دولار ف احنا بنتكلم فى حدود 36 الف جنيه .
عاوز اعرف رايكم في السعر والموبايل التابلت دا .
تعليقات
إرسال تعليق